Agent namatay nga way sapot
CEBU, Philippines - Usa ka call center agent ang napalgang patay nga wala nay sapot pasado alas-2 sa hapon kagahapon diha sa dalan Ma. Cristina barangay Capitol Site.
Ang biktima nailhan sa ngalan si Mark Pacatang, 27, lumad nga taga Dipolog City ug kasamtangan nga nagpuyo sa nahisgutang lugar.
Sa pakighinabi sa Banat News ni SPO4 Alex Dacua kini mibutyag nga nakatimaho og patay ang mga silingan sa gipuy-an ni Pacatang hinungdan nga ilaha kining gisusi.
Sa ilang pagsusi, nakit-an nila ang patay’ng lawas sa biktima nga naghubo ug nag-ubo sa higdaanan.
Nakita usab sa kapolisan nga daw nagubot na ang kwarto sa biktima ug aduna kini samad sa tuong bahin sa iyang ulo.
Matud pa ni Dacua nga ila pang ipasusi ang patay’ng lawas kun unsay nakaingon sa kamatayon niini. Apan nagduda silang posibleng nakaila kini sa mamumuno sanglit walay timailhang gipugos og abli ang lawak ni Pacatang.
Susihon pa usab ang nakuha nilang impormasyon nila ni Dacua nga mahuyang si Pacatang. (BANATNEWS)
- Latest
- Trending
