Talisay kuyaw'ng hugpaan sa dengue

CEBU, Philippines - Ang mga lugar sa dakbayan sa Talisay nga gisanapan sa baha tungod sa sunod-sunod nga pagbundak sa kusog nga uwan gikabalak-ang hugpaan sa sakit nga dengue.

Si Arturo Bas, nga maoy Public Information Officer (PIO) sa siyudad nagkanayon nga ang kagamhanan sa Talisay migamit na og bomba aron pagsanta sa mga lamok sa dengue gikan sa mga nabara nga tubig sa mga lupa nga bahin sa barangay.

Sa miaging buntag ang mga kawani sa city engineering office maoy gisangonan sa pagbomba sa mga nagpundong tubig diha sa lupa nga lugar sulod sa Lawaan III Elementary School.

Kini human ang mga ginikanan sa mga estudyante sa maong tunghaan mipabati sa ilang kabalaka nga ang mga nagpundong tubig himoong itloganan sa lamok nga dengue nga magbutang sa dakong peligro sa ilang mga anak.

Si Bas nagkanayon nga niadto lang miaging adlaw sila nasayod sa maong sitwasyon human nila kini makita sa news sa TV hinungdan nga nagpadala dayon og tawo nga maoy namomba ug mipahubas usab sa tubig nga napundo.

Gawas sa nahisgutang tunghaan ang mga nagpuyo sa sitio Machacao, Seguera Compound, Tangkungan sa barangay Poblacion, nabalaka usab tungod kay kapin nang usa ka semana ang nagpundong tubig sa baha sa ilang lugar human sa pagbundak sa kusog nga uwan. (BANATNEWS)