Mga traysikad pabutanga'g reflectors

CEBU, Philippines - Gumikan sa peligrong nagpaabot sa mga traysikad nga mamasahero sa mga dagkong kadalanan sa lalawigan, si Provincial board member Juan Daan miawhag sa mga opisyal sa barangay sa tibuok lalawigan nga mopasar og ordinansa nga magmando sa mga operators sa traysikad nga butangan gyud og reflectorized gadgets ang ilang mga traysikad aron daling makit-an ilabi na sa kagabhion.

Sumala pa ni Daan diha sa iyang gipasar nga resolusyon nga importante kaayo nga ang mga barangay officials mopugos gyud sa mga drivers ug operators nga magbutang og reflectors.

Sigun pa ni Daan nga dili layong madumbolan ug madasmagan ang mga traysikad nga magdagan diha sa mga highways partikular na sa mga kalungsuran sa unang distrito kun wala niini.

Dugang pa ni Daan nga angayan usab nga i-regulate sa mga barangay officials ang mga driver sa habal-habal aron kaminusan ang aksidente ug maprotektahan ang kinabuhi sa mga pasahero.

Ang maong resolusyon gipadala ngadto sa tanang mga barangay pinaagi sa presidente sa Federation of Association of Barangay Council sa probinsiya sa Sugbu nga si Provincial board member Jose Ribomapil Holganza Jr.

Samtang ang tanang mga local government units gipanghatagan usab og kopya sa maong resolusyon aron makahimo usab og lakang bisan og ang mga traysikad driver ubos sa hurisdiksyon sa mga barangay kapitan sa lalawigan sa Sugbu. (BANATNEWS)