CEBU, Philippines - Siyam ka pamilya sa sitio Crasher, barangay Lawaan III, dakbayan sa Talisay ang namakwit niadtong Biyernes sa gabii tungod sa pagdahili sa yuta nga gitukoran sa ilang mga balay.
Ang mga apektadong pamilya mitaho ngadto sa kapolisan mao sila si Laling Aluistaga, 60, Christopher Aluistaga, 35, Bobby Bacus, 32, Renante Loberanes, 38, Noreen Armecin, 34, Ethel Ababon, 36, Teodula Bayking, 28, Jesusa Pacaña, 53 ug Ritchel Gabijan, 36.
Si PO2 Stephen Sefuesca sa Talisay City Police Station kinsa maoy gitahasan sa pagsusi sa lugar mibutyag kagahapon sa Banat News nga ang mga balay sa nahisgutang mga pamilyang naapektohan nahimutang sa ibabaw nga bahin sa bungtod.
Sumala pa ni Sefuesca, ang yuta mihumok na ug miliki ug nagkaanam na og dahili sa paubos tungod sa sunod-sunod nga pagbundak sa kusog nga uwan sa mga nangaging adlaw.
Matud usab niya nga uban sa mga balay ginama sa kahoy apan pipila niini nga kongkreto. Usa sa mga balay nga sementado ang sawog miliki na ug gihulagway niyang delikado nga mahugno.
Samtang gawas sa mga balay nga peligrong modahili paubos, aduna usab usa ka balay sa mas taas nga bahin nga may kongkretong paril ug nahadlok silang kun mahunlak kini adto kini moigo sa kabalayan sa ubos.
Si Sefuesca nagkanayon nga ang uban nga mga naapektohan temporaryo unang namakwit ngadto sa ilang mga paryente diha sa duol samtang ang uban mibakwit sa barangay hall.
Hinuon pipila kanila namalik na sa ilang mga pinuy-anan human mohunong na ang pagbunok sa uwan.
Ang Philippine Atmospheric Geophysical and Astronomical Services Administration sa Mactan niadtong milabay’ng semana mipahibalong masinati ang kusog nga pagbunok sa uwan kutob Hulyo 31.
Si Arturo Bas ang Public Information Officer (PIO) sa siyudad sa pakighinabi niini kagahapon sa Banat News nagkanayon nga wala sila’y nadawat nga report gikan sa maong barangay ug sa city social welfare kabahin sa maong insidente.
Tungod niini mohimo sila og pakisusi sa maong dapit aron masuta ang gikinahanglang buhaton sa dakbayan.
Gawas sa sitio Crasher sa Lawaan III, ang barangay Lagtang, Maghaway ug Manipis nga mga bukirang barangay sa siyudad gihulagway usab nga delikado sa pagdahili sa yuta.
Matud ni Bas nga ang mga residente diha sa barangay Lagtang giawhag na sa siyudad nga pabalhinon sa mga relocation site diha sa barangay Dumlog ug Biasong apan hangtud karon nagpabilin gihapon ang mga molupyo sa ilang gipuy-an. (BANATNEWS)