Liog mibuto human makuryente samtang nag-tap og wire sa plangka

CEBU, Philippines - Patay ang usa ka 22-anyos nga lalaki human mobuto ang iyang liog human kini makuryentehi samtang nagtaod og linya sa kuryente kagahapon sa mga alas 9 sa buntag diha sa sitio Katap, barangay Banlot, lungsod sa Sibonga.

Ang biktima mao si Pablito Redella, residente sa maong lugar kansang liog mibuto tungod sa kakusog sa boltahe sa kuryenteng milatay kaniya ug wala nay kinabuhi nga napalgan sa iyang mga paryente.

Si SPO2 Marlon Cortes nga nahinabi sa Banat News kagahapon mibutyag nga base sa imbestigasyon ni PO3 Antonio Sanchez sa wala pa mahitabo ang insidente si Redella nagtaod og wire sa kuryente diha sa breaker sa ilang silingan paingon ngadto sa ilang balay.

Samtang si SPO4 Rolando Almonicar nga nahinabi usab sa Banat News kagahapon mibutyag nga wala palonga ni Redella ang plangka sa kuryente samtang naghimo niini ug ang gibarogan sa biktima nga yuta basa tungod sa uwan.

Matud ni Almonicar nga mi-ground ang wire nga gigunitan ni Redella ug gituohang sa kakugang niini imbes nga buhian ang wire nalambod na kini hinuon sa iyang lawas.

Ang biktima nalabay og pila ka metros gikan sa iyang gibarugan ug namatay.

Si Cortes sa iyang bahin mihulagway nga ang sitio Katap, barangay Banlot bukirang barangay kini sa Sibonga nga dunay gilay-on nga mokabat ngadto sa 10 ka kilometros gikan sa lungsod ug lisod pa nga agian ang karsada sa maong lugar apan duna nay kuryente ngadto.

Kasagaran sa mga residente sa lugar mokutay lang og kuryente ngadto sa ilang silingan nga dunay mga koneksiyon aron makabaton og sugang dagitabnon. (BANATNEWS)