CEBU, Philippines – Human sa nahitabong pagka-eskapo sa usa ka piniriso sa Cebu City Jail gi-relibuhan ang Jail Warden nga si Supt. Waldemar Villanueva sa regional director sa Bureau of Jail Management and Penology.
Ang mihulip kang Villanueva mao ang iyang Assistant Deputy Jail Warden for Administration nga si Jagorin Aliño sugod niadto pang Huwebes.
Giingong ang pagrelibo kang Villanueva gimando gumikan sa pag-eskapo sa usa sa ilang mga pinirisong si Reynald Martorillas, 44, taga Sitio Baka barangay Banilad ning dakbayan.
Si Martorillas nakombikto sa miaging buwan og 15 ka tuig nga pagkabilango sa kasong kalapasan sa Section 11 sa Republic Act (RA) 9165 kon paghupot sa ilegal nga drugas ug Batas Pambansa (BP) No. 6 nga paghupot og mahait nga hinagiban.
Nasayran nga niadtong Martes sa alas-2 sa hapon nagkuha’g mga basura ang trak sa dakbayan sa Sugbo nga maoy gisakyan ni Martorillas samtang adunay usa ka inmate nga mitug-an nga mga 15-minutos sa wala pa moabot ang truck sa basurahan, ilang nakit-an si Martorillas sa dumpsite.
Sukad niadto wa na gyud nila kini makit-i.Giingong nakalusot sa control gate ang piniriso human nagpakaaron ingnong dunay ayuhon isip usa sa mga mekaniko.
Dako ang pagtuo sa mga kadagkuan sa City Jail nga nakasakay si Martorillas sa trak sa basurahan ug hangtud karon padayon pa ang ilang pagpangita niini. (BANATNEWS)