Ex-tanod gitipi sa barangay Sto. Niño

CEBU, Philippines – Naglunang na sa kaugalingong dugo ug wala nay kinabuhi ang usa ka kanhi barangay tanod sa barangay Santo Niño human kini gipaulanan og bala sa tulo ka wala mailhing mamumuno pasado alas-12 sa kaadlawon sa dalan MC Briones barangay Sto. Niño ning dakbayan.

Ang biktima nailhan nga si Joseph Padayon, 28, molupyo sa nahigusgutang lugar ang nakaangkon og samad pinusilan sa iyang ulo ug nawong.

Base sa imbestigasyon sa kapolisan nasayran nga ang biktima usa na karon ka kargador ug nakit-ang nagtulod sa iyang kariton nga puno sa utanon dihang kalit nga miabot ang tulo ka wala mailhing mamumuno.

Ang mga gikatahapan midiretso og paulan og bala sa biktima nga miresulta sa iyang hinanaling kamatayon. Gisuwayan pa unta pagtabang sa mga tawo nga nakakita sa panghitabo apan nakabsan kini sa kinabuhi.

Sa pakisusi sa kapolisan sa crime scene nakuha ang usa ka kabhang sa kalibre .45 ug ang usa ka slug nga maoy gituohang gigamit sa pagpusil.

Sa pakighinabi sa Banat News ni SPO4 Alex Dacua mibutyag nga ang biktima adunay gikasumbagay sa miaging adlaw nga molupyo sa sitio Bato sa barangay Ermita.

Matud pa ni Dacua nga naglisod pa sila karun sa pagsubay kun si kinsa ang mamumuno sa biktima kini tungod kay wala bisan usa nga mihatag og impormasyon.

Sa laing bahin, usa ka lalaki nga si Harold Palang, 35, molupyo sa dalan Sikatuna sa barangay Day-as ning dakbayan ang gidunggab sa silingang si Ruel Espina.

Ang biktima nagbarog-barog lang sa gawas sa ilang panimalay dihang kalit giduol sa suspetsado ug gihansakan og kutsilyo sa walang bahin sa tiyan.

Ang suspek daling miikyas palayo samtang ang biktima gidala sa Cebu City Medical Center. Nasuta nga dugay nang managkaaway ang duha sumala pang Dacua. (BANATNEWS)