Gatusan natanggong, PAL pilots mi-resign

CEBU, Philippines – Gatusang mga pasahero sa domestic ug international flights sa Philippine Airlines (PAL) human pipila sa ilang mga piloto mibiya sa maong kompanya ug mibalhin sa laing airline companies gumikan sa mas taas nga sweldo.

Onse ka domestic ug international flights sa PAL kagahapon lakip na ang padulong dinhi sa Sugbu ug Kabisay-an ang gikanselar.

Sa report sa ABS-CBN News gikan sa radio dzMM , upat sa mga domestic flights padulong Cebu (PR 843), Cagayan (PR 181), Bacolod City (PR 133) ug Iloilo (PR 147).

Ang lain pang gikanselar nga flights mao ang upat ka domestic flights nga gikatakda untang motugpa sa Cebu (PR 344), Cagayan (PR 182), Bacolod (PR 134) ug Iloilo (PR 148).

Samtang duha ka flights gikan sa Hong Kong padulong sa Manila (PR 313 ug PR 319) ug laing flight padulong sa Hong Kong (PR 318) ang gikanselar.

Sa report sa cable news channel ANC, si PAL spokesman Jonathan Gesmundo nagkanayon nga ang mga gikanselar nga flights naglambigit sa ilang mga A320 nga mga abyon.

“Unfortunately we have had recent indiscriminate resignations of A320 pilots, and we are now faced with inadequate flight deck crew to man A320 aircrafts,” matud pa ni Gesmundo.

Wala hinuon siya mobutyag kun pila ka mga piloto ang mi-resign apan mipasalig nga gamay ra kini.

Giklaro usab ni Gesmundo nga ang pag-resign sa maong mga piloto walay kalambigitan sa panagbangi sa management ug sa Philippine Airlines Employees' Association (PALEA) tungod kay ang mga "ground" personnel lang maoy miyembro sa PALEA.

Sumala pa niya nga ang mga A320 aircraft pilots nga mi-resign giagni sa ubang airline companies sa ubang nasud bugti sa mas taas nga sweldo nga dili matupngan sa PAL.

Mibahad hinuon siyang ang gihimo sa maong mga piloto usa ka kalapasan sa ilang kontrata diha sa PAL ug "pertinent government regulations."

“PAL will soon be filing appropriate charges against those pilots who chose not to report for work immediately after submitting resignation letters,” matud pa niini ug midugang nga base sa regulasyon kun buot mo-resign ang usa ka piloto kinahanglang magpaabot una sila og unom ka buwan hangtud nga mabansay ang mopuli kanila.

Mipasalig hinuon si Gesmundo nga ilahang atimanon ang mga naapektahang pasahero ug ilaha silang ihatud sa ilang mga destinasyon karong buntag.

Gipahibalo usab niyang kinahanglan una nilang hunungon ang pagpalupad sa mga A320 aircraft sulod sa pipila ka bulan hangtud nga dunay mabansay nga mga piloto. (BANATNEWS)