Police official 'nanghulga'g' 2 babaye

CEBU, Philippines – Usa ka opisyal sa polis ang gipasanginlang nanghulga og duha ka babaye tungod sa insidente sa trapiko niadtong Huwebes sa hapon diha sa parking area sa usa ka mall sa barangay Tabunok, dakbayan sa Talisay.

Ang mga biktima mao si Elsa Fernandez, 50-anyos ug ang anak niining si Prince Kristel, 21, mga residente sa sitio Nonoc, barangay Tabunok, dakbayan sa Talisay.

Ang gipasanginlan mao ang usa ka Major Virgilio Apurado kinsa giingong nadestino sa Police Regional Office (PRO)-7, taga barangay Bulacao, Pardo, dakbayan sa Sugbo.

Ang maong insidente gipa-blotter sa mga biktima niadtong Biyernes sa hapon diha sa kapolisan gumikan sa kahadlok.

Base sa imbestigasyon sa kapolisan ang inahan ug anak nga Fernandez mipasangil kang Apurado nga mikuha sa iyang service firearm gikan sa iyang sakyanan ug gipakita kini ngadto kanila ug nagkanayon nga “naa koy dala nga .45 ug wala ko mahadlok bisag kinsa ninyo.”

Ang duha gibati ug nahadlok ug midiretso nalang og pauli sa ilaha apan nakadesider pagkasunod adlaw sa pagsumbong sa Talisay City Police Station sa barangay Poblacion.

Apan sa maong reklamo sa duha wala sila maghisgot kun unsay hinungdan nga nasuko kanila ang maong opisyal ug mipakita sa maong armas gawas lang sa ‘traffic incident’ nga rason.

Apan si PO2 Amelito Hornales sa traffic division nga gikahinabi sa Banat News mibutyag nga si Apurado mianha usab sa ilang buhatan sa traffic division sa Tabunok ug nagpa-blotter usab sa maong insidente.

Matud ni Hornales nga si Apurado nangangkon nga niadtong Huwebes sa hapon ang iyang sakyanan nga Toyota Tamaraw nga nagtangag sa plakang GKU-828 naatrasan sa sakyanan sa manag-inahang Fernandez.

Niadtong higayona si Apurado paingon na untang mogawas gikan sa parking area.

Giingon nga si Apurado ug ang mga Fernandez nagkasabot lang diha sa parking area apan gihagad ni Apurado ang inahan ug anak nga muadto sa traffic division aron sila magkaatubang tungod kay ang maong opisyal nabalaka nga mao unya ang mapasanginlan nga sad-an apan hangtud sa pagsuwat niining balita ang inahan ug anak wala pa mopakita diha sa buhatan sa traffic division.

Ang Banat News mitawag sa mga numero sa cellphone nga gibilin ni Apurado sa traffic division aron makuhaan kini og dugang pamahayag kabahin sa hitabo apan ang maong mga numero dili ma-contact. (BANATNEWS)