CEBU, Philippines - Ang tag-iya sa nabangga nga Pajero nga nakaingon sa kamatayon sa mekaniko ug pintor manubag og civil liability bisan pa man nga lakip usab kini sa mga naangol sa maong aksidente.
Si SPO3 Eleasar Saromines, imbestigador sa traffic division sa Mandaue City Police Office (MCPO) ang mipadayag niini dihang nahinabi sa Banat News sa follow-up nga gihimo kagahapon.
Matud pa niya nga ang tag-iya nga si Agapito Amores nga taga barangay Marigondon sa nahisgutang dakbayan nakalingkawas hinuon sa kasong kriminal sanglit lakip man kini sa mga biktima sa aksidente.
Si Saromines miingon nga sa imbestigasyon nga ilang gihimo ilang nasayran nga ang namatay nga mekaniko nga si Emerciano Babao maoy nag-ayo sa Pajero nga sakyanan ni Amores.
Dugang pa niya samtang nag-ayo ang maong mekaniko ilang gidunganan og inom og beer uban sa duha niini ka trabahante nga sila si Roly ug helper nga si Michael Ibarsabal.
Human niini ilaha dayon kining gi-road test gikan sa barangay Basak sa dakbayan sa Lapulapu paingon sa dakbayan sa Mandaue subay sa Marcelo Fernan Bridge.
Pagdulhog sa UN Avenue gikan sa Marcelo Fernan Bridge kalit kining nawad-an sa kontrol ug nabangga sa center island. – BANAT NEWS