Mga batan-on gipamusil sa tanod

CEBU, Philippines - Diriyot maigo ang kinatawo sa usa ka batan-on human ilang grupo gipamusil sa usa ka barangay tanod pasado alas-6 sa miaging gabii sa Unchuan Mausoleum, Chinese Cemetery barangay Carreta ning dakbayan.

Ang biktima nailhan nga si Raffy “Tata” Obiña, 19, walay klarong pinuy-anan apan giingong diha magpuyo sa maong sam-ang sa nahisgutang barangay.

Samtang ang suspetsado nailhan nga si Roberto “Boy” Tuñacao usa ka barangay tanod sa nahisgutang barangay.

Base sa inisyal nga imbestigasyon sa kapolisan nasayran base sa gibutyag sa impormante nga si Randolph Bentulan nga nagkalingaw sila og inom uban sa biktima ug iyang mga higala nga sila Renante Obiña, usa ka Agit ug ang pag-umangkon sa suspetsado nga si Richard. Apan tunga-tunga sa ilang panag-inom kalit nga mipatim-aw ang suspetsado nga hubog ug nagbitbit og armas dayon maisugong nangutana kanila, “Kinsay nangawat sa motor sa carwash?”

Apan ang mga batan-on wala maningog sanglit nagpunay na og tulisok kanila ang suspetsado ug nagtion-tion sa gidala niining armas ngadto kanila.

Una niining gitulisok og armas mao ang magulang sa biktima nga si Renarie ug pagkahuman gisikaran pa niya kini.

Hasta ang mga pag-umangkon sa suspek giapil niini pagtion-tion sa gidalang armas hangtud giduol niini ang biktima ug gisinghagan ug gipasanginlan kining kawatan ug maoy mikawat sa maong motor.

Apan ang biktima hugtanong mihimakak sa pasangil hinungdan nga miresulta ang ilang panaglalis ug naglinayogay apan taliwala niini kalit nga gipusil sa suspetsado sa iyang dalang armas ang biktima.

Diriyot maigo ang kinatawo sa biktima ug naigo diha sa walang bugan ug sa walang kamot ug human niini daling miikyas ang suspek sa lugar ug kasamtangang gipangita sa kapolisan, nakuha diha sa crime scene ang usa ka basiyo sa kalibre .45 nga bala.   – BANAT NEWS