CEBU, Philippines - Patay ang usa ka 67-anyos nga lalaki human kini mabanggai sa trailer truck sa pagtabok niini sa karsada kagahapon sa buntag diha sa Cebu South Coastal Road habig sa barangay San Isidro, dakbayan sa Talisay.
Ang biktima mao si Arturo Agero, taga Corazon Village, barangay San Isidro, Talisay samtang ang nakadasmag kaniya nga drayber mao si Teodoro Pangan, 59, taga Jumabon Street, Reclamation Area, dakbayan sa Sugbo.
Si Pangan nagmaneho sa trailer truck nga nagtangag sa plakang GVN-516 ug nagtingkagol na sa Talisay City detention cell samtang nagpaabot sa kasong ipasaka kaniya.
Si SPO2 Frederick Larrobis sa Talisay City Traffic Division nga nahinabi sa Banat News mibutyag nga ang nahisgutang truck dunay kargang mga guso gikan sa dakbayan sa Sugbo paingon ngadto sa lungsod sa Sibonga.
Si Agero kinsa nagsakay og bisekleta diha dapit sa eskina sa San Isidro paingon ngadto sa barangay Dumlog.
Matud ni Larrobis nga si Pangan nangangkon nga “caution” kon yellow pa ang kolor sa suga sa traffic light sa iyang habig ug naapekhan siya sa paghunong hinungdan nga milahos nalang siya.
Si Larrobis miingon nga kun tinuod ang pangangkon ni Pangan nga “caution” pa ang suga sa lane niini, puwa pa usab ang suga sa lane sa biktima nga nagpasabot nga “stop.”
Apan giingong mitabok na ang biktima hinungdan nga naabtan siya sa truck.
Si Pangan nangangkon usab nga misuway siya sa paglikay kang Agero apan ang biktima padayon sa pag-abante hinungdan nga naigo gyud kini.
Ang bisekleta ni Agero nasangit sa trak ug nadaro ang biktima og 10- metros gikan sa dapit diin siya maigo ug nalamba diha sa karsada dayon nalatayan ang iyang mga tiil sa ligid.
Ang Talisay Rescue Emergency Action Team (TREAT) daling midala kang Agero ngadto sa Vicente Sotto Memorial Medical Center (VSMMC) apan wala na makaabot nga buhi. – BANAT NEWS