LP mihangyo PCL election iuswag

CEBU, Philippines - Ang Liberal Party (LP)dinhi sa Sugbo mohangyo sa Department of Interior and Local Government (DILG) nga iuswag ang eleksyon sa Philippine Councilors League (PCL) nga daan nang gitakda karong Agusto 4.

Si konsehal Romeo Villarante sa dakbayan sa Talisay kinsa maoy napili nga presidente sa LP dinhi sa lalawigan mibutyag nga giandam na niya ang suwat alang ning maong katuyoan ngadto kang Regional Director Pedro Noval sa DILG 7 nga iuswag og usa ka semana ang maong piniliay aron kahatagan sila og igong panahon sa pagpangandam sa ilang plataporma.

Kini tungod kay lig-on usab kaayo ang ilang mga kaatbang sa One Cebu Party diin ang mananaog sa maong piniliay magsilbing ex-officio member sa hunta probinsyal.

Gidasonan usab kining maong lakang ni konsehal Jeffrey Anthony Yapha, sa lungsod sa Pinamungahan nga maoy bise-presidente sa LP nga ang pag-uswag sa maong piniliay dili lamang makaayo sa LP kundili bisan sa Once Cebu Party.

 Busa nanghinaot siya nga paminawon sa DILG kining ilang hangyo apan kun dili, wala silay mahimo, matud pa ni Yapha.

Sa pagkakaron pulos na nangandam ang duha ka partido alang sa dakong bugno ug sambunot politikanhon aron ilogan ang usa ka puwesto didto sa hunta probinsyal. – BANAT NEWS