Hubog nga Kano nag-wild, gisikop

CEBU, Philippines - Hubog nga Amerikano nga nag-wild sulod sa usa ka subdivision sa barangay Basak, dakbayan sa Lapulapu giposasan sa mga guwardiya ug gipabalhog sa bilanggoan sa kapolisan.

Ang gidakop mao si Kim Bone, 40, ulitawo, temporaryong nagpuyo sa dalan Salvador, barangay Labangon, dakbayan sa Sugbo.

Si PO1 Gamalil Averilla sa Lapulapu City Police Office nga nahinabi sa Banat News nagkanayon nga mibisita sa iyang higala nga nagpuyo sa Brockfield Subdivision, apan sa dihang nahubog nanghagis kini.

Ang mga guwardiya nga sila si Elmer Liguaton ug Darlin Marie misulay unta sa pagbadlong ni Bone apan nasuko ang Amerikano ug nanghagit hinuon kini og away.

Nakontrolar hinuon sa duha ka guwardiya sa subdivision ang Amerikano ug ilang naposasan. Gihatod nila kini sa buhatan sa kapolisan ug gibalhog sa bilanggoan.

Si PO1 Averilla miingon nga ang maong langyaw mag-atubang og kaso nga paghuboghubog ug alarm and scandal nga maoy hinungdan sa pagkatanggong sa kapolisan.  – BANAT NEWS