CEBU, Philippines - Walo ka opisyal sa kapolisan ang gilahugay kagahapon ni Sr. Supt.Erson Digal, hepe sa Cebu Provincial Police Office.
Sila mao si Sr. Insp. Edward Villarin, hepe sa Boljoon Police Station ug karon gidestino na sa Provincial Service Security Group (PSSG) ug ang mipuli kaniya sa Boljoon isip Officer in Charge (OIC) mao si Insp. Raymundo Rodriguez kinsa hepe sa PSSG.
Samtang si Insp. Gerard Pelare nga maoy hepe sa Asturias Police Station gibalhin na ngadto sa Moalboal ug si Insp. Danilo Santillan nga gikan sa Provincial headquarters maoy gibutang sa Asturias ug ang hepe sa Moalboal nga si Sr. Insp. Rolando Evalle gibalhin sa Provincial headquarters.
Ang hepe sa Barili Police Station nga si Chief Insp. Alexander Solidad anaa karon idestino sa Admin sa CPPO samtang ang gihulip niini sa Barili mao si Sr. Insp. Marlon Gumabao kinsa kanhi Deputy ni Supt. Henry Binas.
Ang mipuli kang Gumabao sa Talisay mao si Sr. Insp. Ciriaco Larrobis nga gikan usab sa Admin sa CPPO.
Matud ni Digal nga ang rason nganong iyang gibalhin si Solidad didto sa Barili tungod sa iyang preparasyon sa UN Mission karong Nobiyembre .
Giklaro ni Digal nga iyang gibalhin og destino ang ubang hepe kay mikapin na sila sa duha ka tuig sa ilang gidestinohang lungsod. – BANAT NEWS