Ubol-ubol gihiwa kay giselosan sa kapuyo

CEBU, Philippines - Gumikan sa pangabubho gihiwa sa lalaki ang ubol-ubol ug gipanunggab pa og 22 ka higayon ang lawas sa iyang kapuyo nga dalaga didto sa barangay Guiwanon, lungsod sa Bantayan island niadtong Miyerkules sa gabii.

Ang biktima mao si Mary –ann dela Cruz, 22, dalaga , samtang ang suspek mao ra usab ang iyang kapuyo nga si Bryan Alon, 24, ulitawo nga taga Bantayan. Si Sr. Insp. Almerante Bacayo, hepe sa Bantayan Police Station mibutyag sa Banat News nga sa sayo pa mihiwasa ang suspek kay nakadawat siya og report nga may uyab ang biktima ug giingong gihatagan kini og cell phone sa uyab.

Ang biktima nga miangkon mitunol sa maong cell phone ngadto sa suspek dayong lakaw.

Sa kalagot sa suspek, gisugdan dayon niya og dunggab ang biktima sa buko-buko, unya tiyan, dughan ug uban pang bahin sa lawas, unya gihiwa pa ang ubol-ubol.

Gihatod dayon sa mga silingan ang biktima sa Bantayan District Hospital apan gibalhin kini sa dakbayan sa Sugbo, samtang ang suspek nadakpan usab dayon sa kapolisan ug mikagulkol na karon sa prisohan. – BANAT NEWS