CEBU, Philippines - Mikabat sa 12,500 ka punoan sa marijuana ang gipangibot sa kapolisan didto sa lungsod sa Balamban kagahapon sa kaadawon sa duha ka plantasyon sa sitio Taro ug Ambakon, sa bukirang bahin sa barangay Bayong sa maong lungsod.
Si Sr. Supt. Erson Digal, hepe sa kapolisan sa lalawigan mibutyag nga ang maong ilegal nga mga tanum pulos na anihunon dihang gipang-ibot kini sa grupo ni Sr. Insp. Januario Sario, hepe sa Balamban Police Station.
Gibana-banang mukabat sa P2 milyones ang kantidad sa maong mga punoan sa marijuana apan matud pa ni Digal nga wala hidakpi sa kapolisan ang tag-iya sa maong plantasyon.
Ang maong mga marijuana gikatakdang dad-on nganha sa provincial headquarters aron idugang kini sa sunogunon nang mokabat sa 15 mil ka punoan sa maong tanom nga mobalor og P3 milyones.
Ang maong mga punoan unang gipanglarot sa kapolisan niadtong miaging Hulyo 14 pinaagi sa hiniusang operasyon sa kapolisan sa Balamban ug Philippine Drug Enforcement Agency (PDEA)-7.
Si Digal miingon nga karong sunod semana iyang padauban ang maong mga marijuana diha sa headquarters dungan sa pagdugmok sa mga vedio karera machine nga nakumpiskar sa kapolisan sa Talisay, Consolacion, Medellin ug Toledo.
Patambungon usab ni Digal si Gobernador Gwendolyn Garcia.
Si Digal mimandar usab sa iyang mga hepe sa kapolisan nga hingusgan ang kampanya batok sa tanang illegal ilabina sa ginadiling drugas gumikan sa grabeng pagkuyanap niini ngadto sa mga bukirang lugar nga dili kaagian og sakyanan. - Rey B. Pasaporte ug Joann Cristine Surigao (BANAT NEWS)