CEBU, Philippines - Si Mayor Paz Radaza sa dakbayan sa Lapulapu nangayo na og hulip ngadto kang Police Regional Office-7 director Lani-o Nerez ug lima ka ngalan sa opisyal nga ihulip kang Lapulapu City Police Office director Mariano Natu-el Jr.
Base sa sulat ni Radaza ngadtong Chief Supt. Nerez niadtong Hulyo 27, subling gihangyo sa mayor nga pahulipan na si Sr. Supt. Natu-el isip direktor sa LCPO.
Matud pa ni Radaza nga si Natu-el buot na unta kining pahulipan sa iyang katungdanan sa panahon pa ni kanhi mayor karon Kongresista Arturo Radaza apan wala kini matagad ni Nerez.
Si Natu-el milapas na sa duha ka tuig nga tour of duty isip hepe sa Lapulapu. Base sa lagda sa PNP, kinahanglan na kining hulipan.
Bisan pa sa mga dagkong krimen nga nahitabo sa Lapulapu sama sa pagpamanhig sa mga binilanggo nga bag-o lang nakagawas sa prisohan human nakapiyansa ug pag-eskapo sa mga notadong binilanggo sa detention cell sa LCPO, wala kini gibasol ngadto ni Natu-el.
Samtang si Natu-el sa iyang bahin nagkanayon nga andam na siyang mobiya sa iyang katungdanan.
Giangkon ni Natu-el nga milapas na siya sa iyang termino.
Hinuon wala pa siya makadawat og kamanduan gikan sa ilang labaw sa pagbiya sa katungdanan.
Samtang nasurpresa ug nalipay si Natu-el nga lakip siya sa gipilian nga mamahimong sunod nga direktor sa Cebu City Police Office. – BANAT NEWS