Cebu crime prone sa Region 7

CEBU, Philippines - Ang dakbayan sa Sugbo maoy crime prone area dinhi sa Central Visayas matud pa ni Sr. Superintendent Melvin Buenafe, hepe sa Regional Intelligence Division sa Police Regional Office (PRO)-7.

Sa iyang report atol sa gipahigayong meeting sa Regional Peace and Order Council (RPOC) niadtong milabay’ng adlaw didto sa Tagbilaran City, Bohol, gisaysay ni Buenafe nga ang mga komon kaayong krimen nga naghitak sa dakbayan sa Sugbo mao ang pagpangawat nga may kapin 2,000 ka kaso samtang kapin usab sa 600 ang kaso sa panulis.

Nagsunod niini ang probinsiya sa Negros Oriental nga may kapin sa 900 ka mga kaso sa physical injuries sa tuig 2010.

Dihang gilusad sa kapolisan ang “Oplan Kontra Boga” sa ikatulong kuwarter sa 2009, mikibra ang krimen nga gigamitan og armas de fuego ngadto sa 424 gikan sa 495.

Ang maong pagkunhod nagpadayon hangtud sa unang quarter niining tuiga apan misaka na usab kini niining bag-o pinaagi sa paggamit og motorsiklo sa mga kriminal.

Sa kampanya nga “Bilang Boga” nga gilusad sa kapolisan sa wala pa ang piniliay sa miaging Mayo niining tuiga, nasuta sa kapolisan nga may kapin sa 11,000 ka mga armas de fuego nga wala marehistro dinhi sa rehiyon.

Nakasakmit ang kapolisan og kapin sa 1,000 ka mga armas de fuego samtang mikapin sa 800 ka mga tawo ang nasikop, ug may 600 usab kapin ang napasakaan og kaso ngadto sa korte.

Nasayran usab gikan sa kapolisan dinhi sa rehiyon nga ang mga langyaw nga turista ilabi na ang mga Koreano nakaamot usab og nagkalainlaing krimen dinhi sa rehiyon. - Brenda D. Batuto ug

Cherlie Domecillo (BANAT NEWS)