CEBU, Philippines - Usa ka mag-uuma namatay human kini pusila sa iyang silingan didto sa Sitio Kapitra, barangay Mangyan , lungsod sa Sibonga sa miaging Martes sa buntag.
Ang biktima nailhan nga si Ronnie Cabello, 29, minyo, nga taga Mangyan samtang ang suspetsado mao usab si Joel Trongco alyas “Kabi”, hingkod, ug silingan sa biktima.
Sumala ni SPO3 Antonio Sanches sa Sibonga Police Station nga naghikay na og pamahaw ang biktima dihang kalit lang giluthang sa suspetsado ug nasabak kini sa walang bahin sa dughan.
Apan bisan samdan nakapangayo pa og tabang sa iyang maguwang uban sa pagtug-an sa mipusil kaniya unya nalup-og ug nabugtoan sa kinabuhi.
Gibutyag usab ni SPO3 Sanches nga ang posibling hinungdan sa maong insidente mao ang pangabubho sa suspetsado sa manghod sa biktima kinsa gidungog-dungog kunong adunay relasyon sa iyang asawa.
Sa pagkakaron gipangita pa sa kapolisan ang suspetsado kinsa misibat human sa hitabo. - Joann Cristine Surigao ug Darrel A. Carumba (BANAT NEWS)