CEBU, Philippines - Duha ang naangol nga naglakip sa 5 anyos nga bata human kini tapsingi sa usa ka sakyanan didto sa sitio Kabaw, barangay Poblacion, lungsod sa San Remegio sa miaging adlaw.
Ang mga biktima mao sila si Renoel Ruedas, hingkod, ug ang kauban niyang 5 anyos nga batang lalaki, nga pulos taga sitio Centro, barangay Poblacion sa maong lungsod.
Ang suspetsadong drayber sa Isuzu Trooper nga nakadasmag sa mga biktima nailhan usab nga si Joemel Decara, 33, minyo nga taga Negros Occidental.
Nasayran nga nagpaingon ang sakyanan ngadto sa dakbayan gikan sa San Remegio dihang pag-abot niini sa sitio Kabaw, mao usay paglabang sa mga biktima ug gumikan sa kakalit sa paglabang napakyas sa pagkontrolar ang suspetsado sa dagan sa sakyanan hinungdan nga natapsingan niini ang mga biktima.
Gidala dayon sa tambalanan ang mga biktima samtang gipriso usab sa kapolisan sa San Remegio ang suspetsado. – BANAT NEWS