Yuta midahili sa buhisan, uwan kutob Hulyo 31

CEBU, Philippines - Naaberya ang mga motorista sa barangay Buhisan human modahili ang yuta ug karon gimando ni Mayor Michael Rama nga papahawaon ang mga residenteng posibleng maigo niini.

Usa ka Junie Dollante kansang balay hapit nang matagak sa ubos sa bung-aw padulong SA dalan ang gimandoan sa Cebu City Disaster Coordinating Council nga adto una mobakwit sa barangay hall.

Ang paril ug kongkretong balay niini naa na sa kilid sa nahugmak nga yuta padulong sa karsada ug hapit na matagak.

Mao usab kini ang sitwasyon sa pipila ka bahin sa maong barangay ug nakababag na sa mga kadalanan tungod sa pipila ka mga punoan sa kahoy nga nangatumba ug mga lapok.

Matud pa ni Executive Officer sa CCDCC nga si Alvin Santiliana nga dunay pipila ka residente ang ila na nga gitambagan nga temporaryong mobakwit sa barangay hall.

Ang Philippine Atmospheric Geophysical and Astronomical Services Administration (PAG-ASA) mipahibalong magpadayon ang pagsige og bunok og kusog nga ulan hangtud sa katapusang adlaw niining bulan Hulyo.

Si May Casilagan, Weather Specialist sa Pagasa-Mactan miklarong walay bagyong nasigpatan ang weather satellite ug ang nasinating pagsige og bunok epekto kini sa Inter-tropical Convergence Zone (ITCZ).

Matud pa niini dili lang ang kabisay-an ang nakasinati niini kondili ang tibuok nasud. Bunga kini sa panag-abot sa bugnaw ug init nga hangin nga maoy nakaingon sa pagdag-om ug pag-uwan. Samtang alerto ang kapolisan dinhi sa dakbayan nunot sa kabalakang motumaw ang mga pagbaha ilabi na sa daplin sa Guadalupe River ug Sapangdaku River ug duha ka bukirang barangay.

Si Supt. Pablo Labra II, Deputy City Director for Operation sa Cebu City Police Office (CCPO) mitug-an nga duna na silay pagpangandam nga gihimo aron moresponde sa mga pagbaha ug landslide.

Ang tigpamaba sa Central Command nga si Lt. Col. Wilson Feria mitug-an usab nga susama sa PNP naniid usab sila sa motumaw nga katalagman ug andam nga mopadala og mga tawo ug ekipo pagtubag niini.

Samtang pinaspasay nga pagpanglimpyo ang gihimo sa Road and Drainage Maintenance Section sa dakbayan sa Sugbu sumala pa ni Niva Bayucot, hepe sa maong buhatan.

Adunay 20 ka tawo ang padayong nanghinlo sa mga dagkong kanal sa siyudad gamit ang heavy equipment alang sa maong operasyon.

Sa dakbayan sa Mandaue, susamang mga pagbaha ang nasinati ilabi na sa barangay Subangdaku, C.Ouano Street sa barangay Looc ug dalan Juan Ceniza sa maong barangay.

Si Mayor Jonas Cortes mimando na sa General Services Office nga paspasan ang pagpanglimpyo sa mga kanal sa dakbayan.  - Rey Pasaporte, Sanden Anadia, Romeo Limpangog ug Jean Rien Armenion (BANAT NEWS)