CEBU, Philippines - Hingpit nang gipatak-opan sa dakbayan sa Lapulapu ang usa ka spa sa milabay’ng adlaw gumikan sa mga nakitang kalapasan sa pag-operate niini sa dakbayan.
Ang gipatak-opan mao ang Chuva-chuva Spa nga nahimutang sa Shang Arcade sa barangay Pajo human mapahigayon ang ocular inspection sa Lapulapu City Health Department sa milabay’ng petsa 22 ning bulana.
Nasuta nga walay sanitary permit, health permits ang unom ka masahista ug walay trained ug lisensiyadong therapist nga sertipikado sa Department of Health ang maong establisamento.
Unang girekomendar sa City Health nga pasirad-an ang maong establisamento ngadto sa City Attorneys Office ug ang naulahi maoy mirekomendar niini ngadto ni Mayor Paz Radaza alang sa desisyon.
Si Radaza kinsa mitambong sa State of the Nation Address ni Pres. Benigno "Noynoy" Aquino III mihatag kini og katungod ni Rolando Duero ang Secretary to the Mayor nga maoy mopagawas sa closure order ngadto sa Chuva-Chuva Spa.
Base sa maong Cease and Desist Order ang management sa Chuva-Chuva gihatagan og lima ka adlaw sa pagkumpleto sa ilang mga kakuwangon sa papeles ug kung mapakyas kini moresulta kini sa "total closure" sa maong establisamento.
Matud pa ni Duero nga gawas sa ilang kalapasan manubag usab kini sa ilang giingong usa sa ilang gihatag nga serbisyo ang "lingam services" nga wala malakip sa gideklarar nilang matang sa ilang negosyo sa ilahang pagkuha og business permit.
Samtang seryoso ang kagamhanang lokal sa dakbayan sa Lapulapu nga dili tugutan ang "lingam services" sa mga spa ug wellness clinics sa dakbayan sa Lapulapu gumikan kay makadaot kini sa imahen sa maong dakbayan. – BANAT NEWS