CEBU, Philippines - Nailhan ug gikatahong nadakpan na sa kapolisan sa probinsya sa Sugbu ang usa sa duha ka suspetsado sa pagpamusil sa tulo ka mga miyembro sa City of Bogo Anti-Crime Task Force (CBACTF) niadtong Huwebes sa miaging semana nga miresulta sa kamatayon sa usa.
Apan si Sr. Supt. Erson Digal, hepe sa kapolisan sa lalawigan nagdumili pagtug-an kabahin sa maong mga dinakpan ug sa mga detalye sa pagkasikop niini sanglit nagpadayon pa ang ilang hot pursuit operation sa laing usa ka kauban nga suspetsado.
“Duna tay nakuha nga info but dili pa nato ma-reveal diha ninyo,” matud pang Digal kinsa nagdumili usab pagkompirmar kun duna silay nadakpan.
Sa nasayran duha ka mga lalaki nga luwan og motorsiklo ang mipaarak sa .9mm submachine pistol sa tulo ka mga CBACTF nga nagpatrolya niadtong higayona diha sa Poblacion dakbayan sa Bogo.
Ang gipamusil mao sila si Alexander Soson ,22, taga Binabag, Norvin Alburo, 22, taga San Vicente, ug Daniel Nailon, 21, taga Bungtod pulos sa dakbayan sa Bogo.
Si Soson maoy nakabsan sa iyang kinabuhi human maigo sa agtang sa maong pagpaarak sa wala mailhing mamumuno, samtang sila si Alburo ug Nailon naigo sa walang paa ug tuong abaga kinsa anaa pa sa Vicente Sotto Memorial Medical Center.
Si Digal mitug-an nga niadtong Sabado una niyang gipadala sa siyudad sa Bogo ang dugang Regional Mobile Group (RMG)-7 ug kagahapon human sa paniudto gipadala usab ni Digal sa siyudad sa Bogo ang usa ka team sa Special Reaction Unit (SRU).
Matud pa ni Digal nga ang RMG ug SRU maoy mag-conduct og random checkpoint adlaw ug gabii aron malikayan ang posibling panghitabo diha sa maong dakbayan. (BANATNEWS)