CEBU, Philippines - Patay nang nalandig sa tambalanan ang usa ka lalaki human dunggaba sa iyang silingan kagahapon sa kaadlawon diha sa eskina sa dalan Magallanes ug Escaño Warwick Barracks, barangay Ermita ning dakbayan.
Ang biktima nailhan nga si Jonhtey Pautan Tanoco, 22, nagpuyo sa Bulacao-Pardo samtang ang suspetsado giilang si Roger Heñales Torres, 35, usa ka manindahay og prutas nga taga sitio Kawit barangay Ermita ug parehas sa biktima lumad nga taga syudad sa Carcar.
Sa pakighinabi sa Banat News sa iyaan sa biktima nga si Editha Tanoco giingong nagduwa pa og dama ang biktima ug ang suspek ug nananghid ang iyang pag-umangkon nga diha sa ilahang balay kini matulog.
“Tiya, adto ko matulog sa inyo, balika ko dire,” apan dihang iyang gibalikan pipila ka minutos ang nakalabay iyang nasugatan ang duha nga nag-agbayay apan kalit nga natumba ang iyang pag-umangkon ug nagkadugo.
Ang gikahibulong ni Editha mao ang pagkaratil og dagan ni Torres hinungdan nga siya misiyagit og pakitabang sa mga tanod maong nadakpan kini nila ni Vicente Bosque, Gaspar Bagolo ug Bienvenido Dejacto. (BANATNEWS)