Pista sa Compostela; 1 patay

CEBU, Philippines - Patay ang usa ka 18-anyos nga batan-ong giingong sakop sa gang human kini pusila sa laing batan-on nga sakop usab sa Tau Gamma Phi fraternity atol sa disko nunot sa kasaulogan sa kapistahan sa lungsod sa Compostela niadtong Domingo sa kaadlawon.

Ang biktima mao si Johnrey Rodriquez, 18, molupyo sa sitio Aggies Poblacion sa maong lungsod samtang ang suspek nailhan lang sa pangalan nga alyas Baho ug nagpuyo ra usab sa maong lugar.

Matud ni SPO3 Wilfredo Caturza, imbestigador sa kapulisan sa Compostela ang biktima paingon na kining mopauli gikan sa disko ug samtang naglakaw sa karsada kauban ang iyang barkadang 16-anyos nga taga Mango Avenue siyudad sa Sugbo gisundan sila sa suspek ug pag-abot sa ngitngit nga lugar kalit gipusil ang biktima duha ka higayon.

Naigo sa sentro sa luyong bahin sa ulo ang biktima ug nahagba diha-diha dayong sibat pahilayo sa suspek.

Ang biktima daling gihatud sa mga tawo sa maong lugar sa Danao District Hospital apan tungod sa delikadong kahimtang gibalhin sa Vicente Sotto Memorial Medical Center apan gideklarar nga dead on arrival.

Ang nirespondeng mga polis nakarekober og usa ka slug sa kalibre .22 nga pistola sa crime scene ingon man kalibre .22 nga armas nga wala nay sulod nga bala nga maoy gituohang gigamit sa suspek.

Sa paghimo ning balita padayon ang manhunt operation sa kapulisan pagsikop sa maong suspek aron manubag sa salaod nga iyang nahimo.

Giangkon hinuon ni Caturza nga lakip sa nag-unang problema nila sa lungsod mao ang mga batan-on nga nagpasakop sa mga gangs ug fraternity nga mag-away sa higayon nga magkatagbo.

Malinawon ang kasaulogan sa kapistahan sa lungsod sa Compostela sa miaging adlaw bisan paman adunay usa ka insidente sa pagpatay matud pa ni Sr. Supt,. Erson Digal, hepe sa kapolisan sa lalawigan.

Si Digal nga personal nga mibisita sa maong lungsod mihulagway nga generally peaceful ang kapistahan kini bisan paman wala pa masulbad ang problema sa election protest.

Sumala pa ni Digal nga maayo ang pagkadala sa kapistahan sa Officer in Charge (OIC) Mayor nga si DILG-7 director Pedro Noval sanglit ang tanang department heads pulos mitambong sa pontifical mass.

Si Digal nagpadala og usa ka platoon sa Regional Mobile Group (RMG), Special Reaction Unit (SRU) ingon man duna sab siyay gi-augment nga mga polis gikan sa kasilinganang lungsod, usa ka semana sa dili pa ang kapistahan tungod sa pagduda nga mohimo unya og kagubot ang mga supporters sa duha ka habig nila ni kanhi mayor Ritchie Wagas ug mayor Joel Quiño. (BANATNEWS)