Ihawan sa Talisay may problema

CEBU, Philippines - Nabara ang inihaway og baka ug kabaw sa ihawan sa dakbayan sa Talisay kay naguba ang ilang hoist kon bitayanan sa mga dagkong hayop nga inihaw, busa mikibra karon ang kinitaan sa maong ihawan.

Matud pa ni Dr. Galileo Larawan, ang beterinaryo sa Talisay nga dugay nang nadaot ang ilang hoist apan hangtod karon wala pa ikapaayo sa kagamhanan busa wala na sila kapangihaw og dagkong hayop.

Gitug-an ni Larawan sa Banat News nga ila nang gipahibawo ang buhatan sa General Services Office sa dakbayan kalabot ning maong problema sukad sa pagkaguba sa maong ekipo niadtong Abril ning tuiga.

Gipasabot sa city veterinarian nga naglikay usab sila pagsagop sa sistemang mano-mano nga pagpangihaw sa kabalaka nga mahagbong ang maong ihawan sa evaluation nga himoon unya sa National Meat Inspection Services (NMIS).

Ang ihawan sa Talisay anaa sa kategoriyang “AA” standard ug gani napili kining “Best Slaughter House” sa national category sa miaging tuig.

Gibutyag ni Larawan nga niadtong wala pa magusbat ang ilang hoist , makaihaw sila og 20 ngadto sa 30 ka baka ug kabaw matag adlaw ug modaghan pa kini kung holiday.

Kutob sa magpa-ihaw og baka o kabaw diha sa maong ihawan magbayad kini og P144.7 sa 116 ka kilo nga karne na niini, P145.31 sa 117 ka kilo ug P149.04 sa 180 ka kilo.

Sa baboy , ang maong ihawan moihaw og kapin sa 100 ka ulo nga bayran sa magpaihaw og tag P2.25 matag kilo.

Apan si Talisay City Administrator Richel Bacaltos nga nahinabi sa Banat News nagkanayon nga dili lang ang pagkaguba sa hoist maoy ilang problema, kundili bisan sa mangingihaw sa mga dagkong hayop.

Gipasabot ni Bacaltos nga sa pagsugod sa ihawan og pangihaw og mga baka ug kabaw, ang mangingihaw sa tag-iya sa dagkong hayop maoy moihaw basta mosubay lang sila sa lagda sa NMIS.

Matud pa usab ni Bacaltos nga gipatambong nila sa seminar ang mga mangingihaw sa tag-iya sa hayop, apan dihang nakakat-on na kini dili na maoy paihawon sa tag-iya sa ilang hayop.

Sa kapungot sa mga kadagkuan sa maong ihawan gipahunong ang pagpangihaw sa mga dagkong hayop , puslan man.

Naglingaw-lingaw gipanunggab

Duha ka tawo nga naglingawlingaw sa reclamation area sa dakbayan sa Mandaue gipanunggab sa wala hiilhing lalaki sa miaging gabii.

.Ang mga biktima mao sila si Paradelino Suello, ug Lito Pasenabo, pulos 34 anyos ug minyo, ug pulos stay-in worker sa GDA water supply sa Holyname, sa barangay Mabolo ning dakbayan sa Sugbo.

Si SPO3 Kerwin Bejir sa Investigation Detection and Management Bureau sa kapolisan sa maong dakbayan miingon nga pulos nakainom og ilimnong makahubog ang mga biktima nga nagsuroysuroy sa reclamation area.

Apan matud pa ni SPO3 Bejer nga wala damha sa duha nga samtang naglakaw sila sa dalan CD Seno, sa barangay Tipolo ilang nasugatan ang usa ka lalaking wala hiilhi ug igo lang nangutana kanila kun unsay ilang problema dayong lanit sa iyang kutsilyo ug gihansak ngadto kang Pasenado.

 Gisagang ni Pasenado ang kutsilyo busa gitaroyan ang iyang bukton.

Dihang usban pa unta siya og hansak, dali siyang nakadagan paingon ngadto sa buhatan sa SWAT. apan si Suello nga mitiurok sa kakuyaw, maoy giatubang sa kriminal ug gitusaktusak ang kalawasan niini sa iyang kutsilyo.

Hinuon bisan samaron nakadagan gihapon si Suello ug maayo nalang kay gipasagdan nalang siya sa kriminal.

Nahiabot ang mga sakop sa SWAT team apan nakasibat na ang kriminal ug gihakot nalang nila ang duha ka angol ngadto sa tambalanan.(Romeo T. Limpangog) (BANATNEWS)