Yangungo sa mga militante mao gihapon

CEBU, Philippines - Mga lokal nga militanteng grupo sa Sugbo susama gihapon og mga gipangyangungo kaniadto sa bag-ong pamunoan sa nasud atol sa ilang gihimong “lightning rally” diha sa dalan Colon kagahapon pipila ka oras sa wala pa magsugod ang State of the Nation Address (SONA) ni Presidente Benigno ‘Noynoy’ Aquino III kagahapong adlawa.

Ang Akbayan Party- Cebu ug ang Alliance of Progressive Labor uban sa 75 nila ka mga miyembro nga nagbitbit og placards midemanda og kasulbaran sa kakabus sa mga Filipino ug ang paghunong sa kurapsyon lakip na ang pagrespeto sa tawhanong katungod.

Ang maong mga yangungo mao gihapon ang mga gipangayo sa maong grupo ngadto sa mga nangaging mga administrasyon.

Sagad sa mga nahimong presidente sa nasud pulos misaad nga sulbaron kining maong mga problema apan ang tanan nangapakyas. Si Aquino kansang kasikat nagagumikan sa maayong gawi sa iyang mga ginikanan misaad nga wagtangon niini ang kakabus, kurapsyon ug uban pa.

Sa pakighinabi sa Banat News sa coordinator sa maong rally nga si Mikay Dumabok, kini mibutyag nga ang rason sa ilang rally mao ang pagpahinumdom kang Aquino sa iyang mga gipanaad sa katawhan.

Lakip sa ilang gipanawagan mao ang pagpatangtang kang Ombudsman Merceditas Gutierrez tungod sa pasangil nga may gipaboran kini sa iyang mga desisyon ug gisaway usab sa grupo ang Commission on Elections nga gitugotan ang anak ni kanhi presidente ug karon Kongresista Gloria Macapagal Arroyo nga si Mikey Arroyo nga molingkod isip representante sa Ang Galing Pinoy Partylist.

Mibahad hinuon ang mga militante nga ilang pakgangon si Aquino kun dili makahatag sa gipanaad niini sama sa ilang gihimo sa ubang pangulo sa nasud. (Joann Cristine Surigao, PIT-Intern) (BANATNEWS)