CEBU, Philippines - Mga biktima sa sunog kagahapon sa kaadlawon diha sa sitio Care Purok 8 Camputhaw ning dakbayan sa Sugbu naglaom nga makabalik og tukod sa ilang balay.
Sumala pa sa usa sa mga kagawad sa maong barangay sa report sa Balitang Bisdak kagahapon nga adunay nanag-iyang pamilya ang maong luna ug kinahanglang mananghid pa sila kun tugutan nilang makatukod og balik ang mga nasunogan.
Ang sunog milanat og 40 minutos ug gideklarar nga 2nd alarm ug milamoy sa dul-an 30 ka panimalay kansang mga residente temporaryong gibutang sa Camputhaw gymnasium.
Gibana-banang P2 milyones ang danyos sa maong sunog apan walay nasakitan.
Si fire investigator Roelan Marratas mibutyag nga ang sunog diha magsugod sa panimalay ni Nelsa Norca nga gidudahang nagsugod sa luag nga switch sa plangka sa kuryente nga gidudahan niyang natuloan og tubig sa ulan. (Denky Catanda,PIT Intern) (BANATNEWS)