5 ka lugar gihugpaan sa dengue
CEBU, Philippines – Lima ka lungsod ug dakbayan ning lalawigan sa Sugbo ang gituohan sa Cebu Provincial Health Office (CPHO) nga taas og kaso sa nataptan sa dengue.
Kini mao ang mga syudad sa Danao nga nay 63 ka kaso, Talisay,52; Toledo , 44; ug mga lungsod sa Asturias, 51; ug Balamban, 21. Si Dr. Catherine Mae Buscato, Medical Specialist sa CPHO nagkanayon nga niining panahon sa tinguwan gipaabot nilang mopaspas ang pagsaka sa kaso sa dengue.
Sa pagkakaron gipanghingusgan sa Department of Health (DOH) ang kampanya batok sa dengue.
Kini pinaagi sa pag-awhag sa mga molupyo nga manghinlo kanunay sa ilang balay ug sa palibot niini ug sa pagsagop sa lima ka "S" nga mao ang search and destroy, self protection measures, sick early treatment, ug ang say no to indiscriminate fogging.
Nagpasabot kini bahin sa paglabay sa tubig nga walay gamit, pagtakob sa mga baril nga may sulod nga tubig, pagkuha sa tubig nga may sandayong, ug pagkulob sa tanang mga butang nga kapundohan og tubig.
Pagsul-ob og pajama kung matulog ug butangan og screen ang balay aron dili makasulod ang lamok.
Ikonsulta dayon sa doktor kun anaa nay hilanat ug gidili ang pagpaaso. (BANAT NEWS)
- Latest
- Trending
