Mium-om sa pusil namatay!

CEBU, Philippines – Patay diha-diha ang usa ka 46-anyos nga panday human giingong mium-om sa sumbohan sa pusil sa iyang suod nga higala ug aksidenteng nakablitan ang gatilyo kagahapon sa kaadlawon diha sa barangay Lamacan, lungsod sa Argao.

Ang biktima giila nga si Petronilo Mansueto Vega, taga sitio Media, barangay Poblacion Argao kansang patay'ng lawas naghukdong na diha sa usa ka cooler dihang naabtan sa kapolisan.

Gipangita karon sa kapolisan ang higala niining si Danilo Puerto alyas "Danny Buang", gibanabanang sobra sa 40-anyos ug residente usab diha sa barangay Poblacion kinsa maoy giingong tag-iya sa armas nga .38 rebolber.

Si SPO1 Arnold Abiner, ang imbestigador sa maong hitabo mibutyag kagahapon sa Banat News nga si Vega ug Puerto parehong mga ulitawo ug suod nga managhigala.

Si Vega sumala pang Abiner gikatahong magmaoy ug babaon kun mahubog hinungdan nga usahay makapahagit kini og tawo.

Sa wala pa mahitabo ang insidente ang duha nakitang nag-inom diha sa usa ka tindahan kilid sa basketball court diin gipahigayon ang disko sa kasaulogan sa pista sa lungsod niadtong Sabado.

Matud ni Abiner nga dihang mibundak ang uwan ang mga tawo diha sa diskohan nangabungkag ug nagpasilong diha sa bantawan lakip na ang biktima ug suspetsado diha usab sa usa ka tindahan.

Sumala pang Abiner adunay mga tawo diha sa duol nga nakabati sa suspek nga misukna sa biktima nga nagkanayon "nakakita ka ani?, nakakita ka ani?" dungan sa paghulbot sa rebolber ug gipakita ngadto kang Vega.

Apan sa kalit lang gikatahong gium-om ni Vega ang sumbohan sa rebolber ug aksidenteng nakablitan sa suspek hinungdan nga mibuto kini sa sulod sa baba sa biktima. Sumala pang Abiner namatay ang biktima nga ang bala nag-ungot gihapon diha sa sulod sa iyang alingagngag diha sa spinal chord.

Ang suspek daling miikyas human sa hitabo ug padayon pang gipangita sa kapolisan.

Sumala pang Abiner nga nakadawat sila og impormasyon kagahapon nga nakit-ang mibiya sa ilang dapit ang suspek pasado alas-9 sa buntag ug gituohang nagtagotago na kini. (BANAT NEWS)