CEBU, Philippines – Hingpit na nga nahibalik sa normal nga operasyon ang modernong ihawan sa barangay Labogon, dakbayan sa Mandaue human ipaayo ang edipisyo ug mga makina niini.
Sa pagkakaron higpit nang gidili ang pag-ihaw og mga hayop sa gawas sa maong ihawan ug kadtong karne nga dili inihaw sa maong ihawan dakpon.
Si Dr. Daisy Penetrante ang beterinarya sa dakbayan mibutyag nga nagsugod niadtong Hulyo 8 ning tuiga ang pagbukas pagbalik sa maong ihawan ubos sa pagsuperbisar sa mga kadagkuan sa National Meat Inspection Commission (NMIC).
Matud pa ni Dr. Penetrante nga iyang gipahimangnoan ang mga operator sukad pa niadtong miaging Hunyo nga kutob sa malapason pasakaan og tukmang kaso.
Si Mayor Jonas Cortes sa iyang pahayag miingon nga iyang gihingusgan ang pagbukas og balik sa modernong ihawan sa barangay Labogon aron makabaton og limpyong karne ang dakbayan.
Ang maong ihawan nga gitukod sa kanhi Mandaue City Mayor Thadeo Ouano nahunong sa iyang operasyon human madaot ang mga kahimanan niini.
Si Engineer Alvin Ceniza nga maoy nagmentinar sa mga makina sa maong ihawan nagkanayon nga ang bag-ong boiler niini makaihaw og 300 ka mga nagkalainlaing hayop matag adlaw sama sa baboy, baka , kanding, kabaw, kabayo ug uban pa. (BANAT NEWS)