CEBU, Philippines – Kritikal ang kahimtang sa magtiayon nga bag-ohay pang nahalinan sa ilang duha ka binuhing baka dihang giatangan ug gipamusposan sa duha ka lalaki samtang naglakaw sa dalan diha sa barangay Bega siyudad sa Toledo niadtong Biyernes sa alas 4:00 sa kaadlawon.
Ang magtiayon mao sila si Cosme Geonzon, ug asawa niini nga si Feliza Geonzon, mga molupyo sa nahisgutang lugar ug nabuhi lang sa pagpamuhi og mga hayopan ug pagpanguma.
Ang anak sa biktima nga si Rolando Geonzon mipadayag dihang nakahinabi sa DyDD nagtuo nga ang halin sa ilang duha ka baka nga nabaligya sa iyang ginikanan ang tuyo sa maong mga tulisan.
Matud pa ni Rolando gibaligya sa ilang ginikanan ang duha nila ka baka sa kantidad nga P25 mil niadtong Huwebes aron idugang sa P30 mil nga bayranan sa ilang igsuon nga babaye nga nanganak sa caesarian section sa Vicente Sotto Memorial Medical Center (VSMMC).
Apan gidemalas ang mga suspek tungod kay P2,500 lang ang kwarta nga diha sa iyang inahan niadtong tungura tungod kay ang halin sa baka napadala na nila sa siyudad aron ibayad sa tambalanan.
Matud pa ni Rolando nga ang ilang paryente ug silingan maoy nakadiskubre sa iyang mga ginikanan nga pulos nagbuy-od sa dalan nga nagkadugo ug nangabun-og.
Sumala pa sa ilang impormasyon giatangan ang duha ug gipamuspusan og gahi nga butang. Si Cosme dunay dakung bunol ug samad sa ulo samtang ang asawa niini dunay dakung bun-og ug samad sa tangkugo.
Si Feliza giingong diha makaplagi sa kilid sa dalan pipila lang ka tikang padulong sa pangpang.
Ang duha daling gihatud sa VSMMC sanglit gihulagway nga naa sa seryosong kahimtang si Feliza tungod kay gibutang kini lahos sa intensive care unit (ICU).
Dugang pa ni Rolando nga sayo momata matag buntag ang iyang mga ginikanan kay moadto sa ilang payag aron sa pagpamalhin sa ilang mga binuhing hayopan sama sa baka kanding ug mga manok.
Si Insp. Jorge Macapobre hepe sa Lutopan Sub- Police Station sa mitug-an sa Banat News nga duha ka silingan sa mga biktima nga sila si Crisanto Paran ug Leonardo Flores ang ilang gidakop.
Ang duha atol ning pagsulat sa balita gipaatubang ngadto sa magtiayon diha sa VSMMC aron ilhon ug sumala pang Macapobre sa pasiunang impormasyon gikan sa iyang mga sakop positibo silang gitumbok sa magtiayon nga maoy mitulis kanila. (BANAT NEWS)