2 spa sa Lapu pasirhan

CEBU, Philippines - Girekomendar sa Lapulapu City Health Department nga ipasirado ang duha ka mga spa sa dakbayan sa Lapulapu nga nagtanyag og “Lingam services” ngadto sa ilang mga kliyente.

Matud pa ni Lapulapu City Mayor Paz Radaza nga human gisusi ni Rodolfo Berame ang City Health Officer ang tanang mga spa ug massage clinics sa dakbayan sa Lapulapu duha niini ang nasutang nagtanyag og lingam massage.

Ang duha ka mga spa nga girekomendar patak-upan mao ang Healing Space nga nahimutang sa usa ka mall sa barangay Pusok ug ang Chuba-Chuba nga naa mahimutang sa Poblacion. Matud pa ni Berame ang Healing Space Massage and Lingam Services nagsugod sa ilang operasyon upat na ka bulan ang nakalabay.

Gawas sa lingam service wala usab silay Mayors Permit, walay Sanitary permits ug walay health cards ang pito ka mga therapists niini.

Samtang ang Chuba-chuba wala say sanitary permit to operate, walay health certificate sa unom ka mga therapists ug walay lisensiyadong therapists nga nagsuperbisar sa ilang operasyon.

Si Radaza sa iyang bahin mipadayag nga iya nang giduso ang rekomendasyon ngadto sa ilang City Attorney alang sa paghimo og aksyon ug misaad nga padayon ang pagpangita niining maong mga matang sa serbisyong makadaot sa imahen sa dakbayan.   - BANAT NEWS