Mga kaso sa Ombuds ipadali og sulbad

CEBU, Philippines - Nakadawat og kamanduan ang mga opisyales sa Visayas Ombudsman gikan ni Ombudsman Merceditas Gutierrez nga ipadali paghuman ang mga kasong nagtanggong gikan sa tuig 2007 paubos.

Si Assistant Ombudsman Virginia Palanca Santiago nagkanayon nga niadtong nakalabay nga adlaw lamang nila nadawat ang memorandum order ni Gutierrez.

Buot ni Gutierrez nga unahon pagresulba ang tanang mga kasong giimbestigar sukad niadtong pipila ka tuig nang nakalabay hangtud sa bulan sa Agusto tuig 2007.

Si Santiago miangkon nga may daghan pang mga kasong wala pa maresulbar sa ilang buhatan apan dili tungod kay ilang gilangay kondili ang kataas sa panahon sa pagkuha sa mga graft investigators sa gikinahanglanon nga mga dokumento ug ebidensiya.

Nagkanayon si Santiago nga usa kini ka dakong hagit sa ilang buhatan tungod kay gikinahanglan nilang doblehan ang paningkamot aron mahatagan og resolusyon ang mga karaang mga kaso nga napundo sa ilang buhatan.

Nasayran nga si Gutierrez gisaway sa pipila ka sektor tungod kay giyak-an ang mga kaso sa Ombudsman ug usa kini sa gibasehan karon sa giduso nga mga impeachment complaint sa mga partylist representative batok ni Gutierrez didto sa Ubos Balay Balaoranan.  - BANAT NEWS