CEBU, Philippines - Usa ang patay ug duha ang angol sa mga sakop sa City of Bogo Anti Crime Task Force kon CBACTF nga gipamusil sa duha ka nagmotorsiklo nga lalaki samtang nagpatrolya ang grupo diha sa B. Rodriquez St., barangay Bungtod siyudad sa Bogo niadtong Huwebes sa alas 11:00 sa gabii.
Ang biktima nga dead on arrival sa tambalanan mao si Alexander Soson, 22, taga barangay Binabag, samtang naangol sila si Norvic Albur, 22, taga barangay San Vicente ug Daniel Nailon, 21, taga barangay Bungtod pulos mga sakop sa CBACTF.
Matud pa ni PO3 Allan Dosdos, imbestigador sa Bogo City Police dihang nahinabi sa Banat News duha ka lalaki nga sakay og motorsiklo nga nag-angkasay ang gitumbok nga responsable sa krimen.
Subay sa imbestigasyon ang mga biktima nagpatrolya sa maong lugar dihang kalit miabot ang mga mamumuno ug dayong hunong sa ilang duol ug kalit nga namusil.
Sumala pa sa kapolisan base sa pamahayag sa mga napusilan nga ang back rider armado og machine pistol maoy mirakrak kanila og gituuhang usa ka magazine ug daling miikyas.
Ang mga biktima daling gihatud sa Verallo District Hospital sa dakbayan sa Bogo apan gideklarar nga dead on arrival si Soson tungod sa naangkong samad pinusilan sentro sa iyang agtang.
Samtang si Alburo naigo sa iyang walang paa ug si Nailon naigo usab sa tuong bahin sa iyang abaga ug lawas ug gibalhin sa tambalanan sa dakbayan sa Sugbo.
Ang mirespondeng mga polis naka-recover og 26 ka kabhang sa bala diha sa crime scene nga gikan sa armas nga gigamit sa suspek.
Gitukod kagahapon sa buntag ni Sr. Supt. Erson Digal, hepe sa kapolisan sa lalawigan subay sa kamandoan ni PRO-7 Chief Supt. Lani-O Nerez aron tutukan ang maong kaso.
Si Digal nagkanayon ang Task Force pangulohan ni Sr. Supt. Melvin Buenafe, hepe sa Regional Investigation Division (RID)-7 ug abagan sa Criminal Investigation and Detection Group (CIDG), Crime Laboratory, Provincial Investigation and Detective Management Branch (PIDMB) ug Provincial Intelligence Branch (PIB).
Ang hepe sa PIDMB nga si Insp. Ruben Cuizon iyang gipaadto sa Vicente Sotto Memorial Medical Center aron kuhaan og affidavit ang duha ka nangaangol.
Si Digal mibutyag nga wala pa nila matumbok kinsa ang mga responsable apan segun sa hepe sa kapolisan sa Bogo, Chief Insp. Alvin Balio nakaila ang usa sa mga biktima sa mga nangrakrak. – Nila ni Darrel Carumba, Rey Pasaporte ug Bong Soriano (BANAT NEWS)