Kasong impeachment gipasaka batok kang Gutierrez
CEBU, Philippines - Gikombinse ni kanhi Representante Risa Hontiveros sa Akbayan Party -list ang ikatulong bahin o 96 ka mga magbabalaod sa ubos balay balauranan nga mopirma aron ang kasong impeachment nga ilang gisang-at batok kang kanhi Ombudsman Merceditas Gutierrez ma-imbistiga sa senado.
Kini human isang-at ang maong kaso ngadto sa Kongreso niadtong Huwebes sa alas 11:30 sa buntag pinaagi nila ni Hontiveros uban nila ni kanhi Brig. General Danny Lim ug Felipe Pestaño.
Gipasukad ang maong kiha batok kang Gutierrez sa betrayal of public trust ug culpable violation of the Constitution.
Kini naglakip sa nabuko nga National Broadband Netwrok (NBN-ZTE) deal, ug ang usa ka kaso sa human rights nga nakadangat ngadto sa United Nations (UN) Committee on Human Rights.
Sa bahin ni Pestaño, ibase niya ang iyang kiha kalabot sa misteryusong kamatayon sa iyang anak nga si anhing Philip Pestaño sa Philippine Navy nga gituohan niyang wala maghikog, sukwahi sa pamahayag sa militar kundi gipatay og tuyo gumikan sa daghang mga anomaliya kalabot sa smuggling nga nadiskobrehan niini. – BANAT NEWS
- Latest
- Trending
