CEBU, Philippines - Nagpadayon ang ikaduhang adlaw sa legislative-executive workshop conference sa mga opisyal sa dakbayan sa Sugbo nga gitumong aron pagpangita og maayong paagi aron sa pagpalambo sa dakbayan.
Ang maong kalihukan nga gisugdan kagahapon molungtad hangtud pa karong adlawa nga anaa gipahigayon sa Costabella Beach Resort gitambongan sa tanang opisyal sa dakbayan.
Si Mayor Michael Rama ug Vice Mayor Joy Augustus Young ingon man ang mga konsehal, miuban sa mga department heads sa maong workshop-conference. Ang ubang opisyal sa City Hall wala hinoon makahatag og tukmang pagpasabot kun ngano nga ang maong kalihukan didto man gihimo sa mahalon nga beach resort nga unta ang dakbayan may training center man sa barangay Taptap.
Pipila ka kawani sa City Hall miingon nga makadaginot pa unta ang dakbayan sa Sugbo kun ang maong kalihukan didto nila gihimo sa Cremdec, usa ka training center sa City Hall nga tua magbase sa bukirang bahin sa dakbayan.
Tungod kay ang maong workshop-conference molungtad pa man hangtud ugmang adlawa ang sesyon sa konseho adto na himoa sa Martes.
Sa maong workshop-conference ang mga konsehal ug department heads giawhag nga mohatag sa ilang mga sugyot unsaon pagpalambo sa dakbayan atul sa administrasyon ni Rama. - Joann Cristine Surigao ug Denky Catanda (BANAT NEWS)