Almirante kasuhan

CEBU, Philippines - Ipasaka gyud sa kapolisan ang kasong homicide batok sa anak ni kanhi board member Antonio Almirante nga mipusil patay sa iyang maguwang kagahapon kini bisan og ang pamilyang Almirante dili mopasaka og kaso.

Si Sr. Supt. Erson Digal ang hepe sa kapolisan sa lalawigan mitug-an sa DyLA nga mipadala na siya og mga imbestigador gikan sa provincial investigation branch uban ang abogado gikan sa regional legal service sa Argao aron pagpreparar sa mga affidavits ug ubang dokumento sa kaso.

Si Digal nagkanayon nga ang PIB maoy mopasaka sa kaso karong adlawa batok ni Antonio Almirante III ug igo lang mo-assist ang Argao Police sa imbestigasyon.

Gipasabot ni Digal nga bisan og dili interesado ang pamilya sa biktima nga si Allan Almirante pagkiha apan buhaton sa kapolisan ang ilang trabaho pagpasaka og kaso diin ang mobarog nga complainant mao ang gobiyerno sa Pilipinas.

Gipaabot hinuon nga maglisod ang kapolisan pagkuha og mga testigo tungod kay mismo ang mga miyembro sa pamilya tua mosimpatiya kaniya inay nga sa biktima.

Si Junjun mipusil patay sa iyang maguwang nga si Allan human gikatahong nanghasi ug misuway pagdunggab kaniya bisan paman gikasahan na sa armas. (BANAT NEWS)