CEBU, Philippines - Gibati og kahadlok ang mga tinun-an ug magtutudlo sa Tubod Elementary School sa barangay Tubod, Minglanilla human sa nahitabong pagpamusil patay sa usa ka magtutudlo ug laing usa angol niadtong Lunes sa alas 5:00 sa hapon atol gyud sa pagpanggawas sa klase.
Giawhag ni Cebu Schools Division Superintendent Arden Monisit ang Department of Social Welfare and Development kon DSWD-7 nga mopahigayon og stress debriefing sa mga magtutudlo ug tinun-an nga na-traumatized sa maong panghitabo.
Matud ni Monisit nga daghang mga magtutudlo ug tinun-an ang nakasaksi sa pagpamusil sa maong mga magtutudlong sila si Serafin Villahermosa ug Roger Maonis.
Giawhag usab ni Monisit ang local nga kagamhanan ug kapulisan nga magbutang og polis sa maong tunghaan aron makuha-kuhaan ang kahadlok sa mga mga tinun-an.
Si Monisit nga personal nga mibisita sa maong tunghaan kagahapon nabalakang maapektuhan ang klase sa maong tunghaan.
Samtang kagahapon, ang asawa ni Villahermosa nanawagan kang Chief Supt. Lani-O Nerez sa Police Regional Office-7 nga paspasan ang pagsikop sa kriminal.
Mihangyo kining tabangan sila sa maong kaso gumikan kay nagduda silang may kalambigitan kini sa pagpatay sa iyang igsuong si Lalaine Jore diha sa barangay Camputhaw nga sumala pa niya nalambigit sa mga dagkong tawo.
Samtang si Police Regional Office-7 director Lani-O Nerez mibutyag sa mga tigbalita nga ilahang tun-an ang hulga sa kinabuhi sa mga Jore alang sa paghatag kanila og seguridad.
Buot pakigkitaan ni Nerez ang pamilyang Jore alang unya sa paghatag kanila og duha ka polis alang sa ilang seguridad ug ingon man pagkuha og dugang impormasyon kabahin sa maong mga pagpatay. (BANAT NEWS)