CEBU, Philippines - Usa ka batang lalaking gibana-banang nagpangidaron palang og usa ka buwan ang napalgang gilabay sa iyang inahan ilawom sa kasagingan didto sa Upper Tingob sa dakbayan sa Mandaue niadtong milabay’ng gabii.
Ang batang lalaki nakit-an sa usa ka Rex Alibio nga usa ka construction worker kinsa milabay sa maong dapit pasado alas 9:00 ang takna kagabii human kini makadungog sa hilak niini sa maong lugar.
Matud pa sa kapolisan sa Casuntingan police station si Alibio wala dayon moduol pagkadungog sa hilak gumikan sa kahadlok nga basin ‘tiyanak’ ang gahilak tungod kay ngitngit ug kasagingan ang lugar.
Si Alibio midiretso og uli ug mibalik ug nagdala na og bolo ug flashlight aron susihon apan sa dihang iyang giwahing ang mga panapton bata gyud kini nga naghilak.
Dihang nakit-an ang bata, giputos kini og mga lampin, gipabalonan og gatas nga gikutaw nang daan, lakip na ang powdered milk, mga sapot, pulbos ug alcohol.
Ang maong bata gidala diha sa Casuntingan Police Station diin gipuli-pulihan og bantay sa mga polis. Ang maong bata kasamtangang giatiman karon sa Department of Social Welfare and Development Service samtang gipangita sa kapolisan ang ginikanan sa bata. (BANAT NEWS)