Live-in mikirig sa kuryente patay

CEBU, Philippines - Patay ang managkapuyo human makuryentihi sa live wire sa Cebu Electric Cooperative (CEBECO) II sa sitio Cogon sa barangay Cogon Cruz sa dakbayan sa Danao alas-11 pasado ang takna sa miaging gabii.

Ang mga biktima mao sila si Artemio Miro, 50, ug Presentacion Jimenez, 43, nagpuyo sa maong dapit ug negosyante og chicharon sa merkado publiko sa maong dakbayan.

Si SPO4 Joselito Salingua sa kapolisan sa maong dakbayan nga nahinabi sa Banat News miingon nga gikan pa ang managkapuyo nagtumod sa ilang chicharon sa merkado publiko sakay sa motorsiklo.

Apan tungod sa pagbunok sa kusog nga uwan ug kusog nga hangin nianang gabhiuna nakasinati og brownout ang kinatibuk-ang dapit sa dakbayan.

Pipila ka mga sanga ug punoan sa kahoy ang nangabali ug natumba sa mainline sa CEBECO II nga nakaali sa dalan.

Matud pa ni Salingua nga naglisod sa pag-agi ang motorsiklo sa duha hinungdan nga sila nanganaog ug nagtinabangay sa pagwahing unta sa mga sanga padaplin.

Apan wala sila magtuong wala pa mapawong ang kuryente sa maong linya hinungdan sa ilang pagkakuryente ug nangamatay.

Ang kanhi barangay kapitan sa Cogon nga si Alfredo Manulat ug mga silingan nga nakamatikod sa maong hitabo dali nga nahidangat sa maong dapit ug maoy midala kanila sa Danao District Hospital apan gideklarar sila sa mga doctor nga patay na.

Si Salingua miingon nga ilang gitan-aw karon ang kaakohan sa CEBECO II sanglit ang naputol man nga mainline sa ilang kuryente ang nakaingon sa kamatayon sa mga biktima.  – BANAT NEWS