Suspetsado sa lugos nasikop

CEBU, Philippines - Usa ka ulitawong gipasanginlang misuway og lugos sa iyang pag-umangkong menor de edad gisikop sa kapolisan didto sa sitio Mansinitas, barangay Tisa, ning dakbayan sa Sugbo kagahapon sa buntag.

Ang suspetsado giila sa kapolisan nga si Ronald Amad Guadiano alyas “Onat”. 27, ulitawo nga taga Tisa.

Si SPO1 Jeffrey Diola sa Special Operations Group (SOG) maoy nanguna sa team sa kapolisan nga misikop sa suspetsado dala ang orden de aresto nga giluwat ni Judge Easter M. Veloso, presiding Judge sa Regional Trial Court Branch 6.

Si SPO1 Diola, mibutyag sa Banat News nga dihang giposasan nila ang suspetsado misuway og babag ang uyoan niini nga si Rocardo Guadiano alyas “Dada”, kinsa pasakaan usab nila og kasong obstruction of justice.

Ang suspetsado nagtingkagol na karon sa prisohan sa kapolisan sa Punta Prinsesa Police Station. (Cherlie Domecillo ug Joann Cristine Surigao,PIT AB Comm intern) (BANAT NEWS)