Naglakaw gipusil ug namatay

CEBU, Philippines - Namatay dihadiha ang usa ka ulitawo human kini pusila sa iyang mga silingan didto sa sitio Ibabao, barangay Agus, dakbayan sa Lapulapu sa miaging gabii.

Si PO1 Kim Lariosa sa homicide section sa kapolisan sa maong dakbayan miila sa biktima nga si Jing Ledesma Deparine, 23 , ulitawo , nga taga Ibabao,samtang ang mga suspetsado nailhan usab nga si Ruel Ostero, 40, ug Paul Macua, hingkod , nga pulos silingan sa biktima.

Hinuon si Macua nadakpan dayon sa kapolisan apan si Ostero nakasibat.

Sumala ni PO1 Lariosa nga ang biktima gikan nga nakig-inom sa iyang mga higala sa usa ka tindahan sa maong dapit unya milakaw kini kay   magkuha og kuwarta sa ilang balay.

Apan nakalakaw lang kini og dyutay, nakita sa mga nakasaksi nga gipusil dayon kini sa mga suspetsado ug gumikan sa mga samad sa lawas, dihadiha nakabsan sa iyang kinabuhi.

Si Macua mikagulkol na karon sa prisohan samtang si Ostero padayon pang gipangita sa kapolisan, ug gisuta pa ang hinungdan sa maong pagpamusil. - Romeo T. Limpangog (BANAT NEWS)