... Taxi operators organisahon-Nerez

CEBU, Philippines - Aron mapanalipdan gikan sa mga tulisan ang mga taxi driver nagtinguha si Chief Supt. Lani-O Nerez uban kang Sr. Supt. Patrocinio Comendador sa Cebu City Police Office ang pag-organisa sa mga taxi operators aron pagtukod og hiniusang base control nga makamonitor kanila.

Si Nerez nagkanayon nga ila nang gipakigtagboan ang mga operators ug rent a car operators sa miaging semana ug gihisgutan ang mga lakang aron mapanalipdan ang ilang mga drayber. Matud pa ni Nerez nga magbutang sila og base control nga ang mga radio sa mga taxi drivers i-centralized aron ma-monitor ang ilang mga biyahe ug aron usab daling marespondehan sa kapolisan o ba kaha matabangan sa mga kaubang drayber panahon sa emerhensiya.

Adunay mokabat 6 mil ka taxi units nga nagdagan dinhi sa Sugbu ug kasamtangang migamit lang og ‘blue light’ nga pasigahon sa ibabaw sa ilang atop aron mopahibalo ngadto sa ilang mga kaubanang taksi drayber nga sila gitulis sa ilang pasahero.

Apan sa nangaging mga inspeksyon kaniadto daghan sa maong mga ‘blue lights’ ang dili na mosiga ug duna say daghang mga drayber nga wala gani katultol sa switch niini.

Kahinumduman nga gipasiugdahan kaniadto ni kanhi CCPO director Supt. Melvin Gayotin ang pagbutang og ‘emergency blue lights’ sa mga taxi units gumikan sa mga nagsunod nga pagpanulis ug pagpatay sa mga drayber. - Rey Pasaporte (BANAT NEWS)