Taxi drayber gitulis gipatay

CEBU, Philippines - Naabtan pang nagtinga ang usa ka drayber sa taxi apan namatay gihapon human kini gigulgol pasado alas-7 sa miaging gabii sa Honey Homes Subdivision barangay Kinasang-an ning dakbayan.

Ang biktima nailhan nga si Alberto Resus, 55, driver sa Catz Taxi nga adunay plate number nga GWY-669 molupyo sa barangay Gun-ob syudad sa Lapulapu.

Base sa imbestigasyon sa kapolisan nasayran nga usa ka Isilino Dignos nga nahiagi sa maong dapit nakabantay sa gi-parking nga taxi ug sa iyang pag-agi sa kilid niini nakit-an niya ang nagtinga nga drayber.

Tungod niini iyaha gisusi og maayo ang sakyanan ug nakit-an niining pwerteng sirit sa dugo gikan sa liog sa drayber hinungdan nga mikaratel siya og dagan ug nangayo og tabang sa barangay. Ang Barangay Pardo Emergency Rescue team nga gipanguluhan ni Kapitan Dave Tumulak maoy daling miresponde sa maong panghitabo apan sa dihang ilang gihiling ang drayber nakabsan na kini sa kinabuhi.

Ang mga sakop sa Homicide Section nga miabot diha sa crime scene ug misusi sa sulod sa taksi mibutyag nga wala pa silay nakitang timailhang adunay nawagtang sa mga butang o kinitaan sa biktima.

Sa pakighinabi sa Banat News ni SPO4 Alex Dacua mibutyag kini nga duha karun ang ilang gitutukan kini mao ang personal grudge ug robbery.

Si Dacua nagkanayon sa report sa ABS-CBN News Central Visayas nga posibleng wala mosugot o misukol ang biktima ngadto sa mga gikatahapan maong gidunggab.

Midugang si Dacua nga ila pa karun nga gipalawman ang ilang imbestigasyon ug ila usab nga gisuta kun wala bay kaaway ang biktima nga maoy posibleng mamahimong suspetsado. - Lesley Caminade (BANAT NEWS)