Massage parlors ipasusi

CEBU, Philippines - Si kanhi Cebu Anti-Indecency Board kon CAIB chairman Dr. Rene Joseph Bullecer mibutyag nga 25 porsiyento sa mga massage parlors ug spa dinhi sa Metro Cebu Area may susama serbisyo sa Lingam massage nga gipasirad-an sa dakbayan sa Mandaue.

Sumala pa ni Bullecer nga dugay na gitanyag ang maong matang sa serbisyo sa mga massage parlor ug spa dinhi sa Sugbu dungan sa pagsulbong sa turismo dinhi.

Gipasabut ni Bullecer nga dili sulbad ang pag-isyu og temporary closure order ni Mandaue city mayor Jonas Cortes sa 789 Thai Lingam Spa nga nahimutang sa A.C. Cortes Avenue sa barangay Cambaro nga gipanag-iya sa usa ka Ernesto Cabalan ug ingon man ang Authentic Lingam Massage nga gipanag-iya ni Bella Talingting nga nahimutang sa Business Park, A.S. Fortuna St. sa barangay Bakilid.

Kini tungod kay ang kakulang sa sanitary permit lamang sa mga kawani ang gibasehan sa temporaryong pagpasira sa duha ka spa ug dili ang serbisyong Lingam massage nga maoy giingong front lamang sa prostitusyon.

Si Cebu City mayor Michael Rama mimando na sa CAIB sa pagsusi sa tanang massage parlors ug spa dinhi sa dakbayan pagsusi kun susama ba ang ilang serbisyo sa gipasirad-ang massage parlors sa Mandaue.

Matud pa ni Bullecer nga ang labing daghang mga spa nga may susama og serbisyo naa magbase sa dakbayan sa Lapulapu tungod sa kadaghan sa mga langyaw’ng turista. (Chester Abadilla ug Sanden Anadia) (BANAT NEWS)