CEBU Philippines - Mikagulkol sa prisohan ang duha ka lalaki, usa niini bayongbayong pa, human hidakpi kay nangawat og mga scrap nga puthaw gikan sa balay sa usa ka huwes didto sa dalan F. Ramos, barangay Cogon, dakbayan sa Sugbo sa miaging hapon. Ang biktima mao si Judge Jasper Dacanay, 64, nga taga F. Ramos. Samtang usa sa mga suspetsado ginganlan og Paul John Baguio, 24, nga taga dalan Sikatuna, Barangay Zapatera, uban sa 15 anyos niyang kauban nga taga dalan T. Padilla , pulos ning dakbayan sa Sugbo.
Sa pakighinabi sa Banat News ni PO2 Allan Ballejo, sa Fuente Police Station, nasayran nga ang mga estambay maoy nakasakop sa mga suspetsado nga misakwat sa mga scrap sa sulod sa balay ni Judge Dacanay.
Matud pa sa kapolisan nga gibitbit na kini sa mga suspetsado ug nagdaling migawas gikan sa balay sa huwes busa gigukod sa mga estambay ug dihang nadakpan , gihatod dayon nila ngadto sa buhatan sa kapolisan sa Fuente. (Joann Cristine Surigao ug Cherlie Domecillo, PIT AB Comm intern) (BANAT NEWS)