Pamayad sa kontraktor susihon

CEBU Philippines - Si Konsehal Roberto Cabarrubias mibutyag sa miaging adlaw nga iyang ipasusi ang hinungdan sa kalangay sa proseso sa pagpamayad sa kagamhanan ngadto sa mga kontraktor   sa nagkadaiyang proyekto ning dakbayan ilabi na sa inprastraktura.

Ang maong lakang himoon ni Cabarrubias gumikan sa nagpungasi nga reklamo sa mga kontraktor bahin sa kahunit mobayad sa kagamhanan ngadto kanila.

Miingon si Cabarrubias nga bisan naandan na sa gobyerno nga dugay kaayong mobayad ngadto sa mga kontraktor gumikan sa ka-estrikto sa pamaagi niini bahin sa pagpagawas og kuwarta, apan miingon si Cabarrubias nga suwayan niya sa pagsuta kun diing bahina mabara ang proseso sa pagpamayad ngadto sa kontraktor.

Si Cabarrubias kinsa maoy tsirman sa komitiba sa inprastraktura nagkanayon nga nasayran nang daan ang bahin sa subasta kon bidding, apan gawas niana asa pang dapita sa proseso sa pagpamayad ang makalangay sa pagpagawas sa kuwarta, matud pa sa konsehal.

Midugang si Cabarrubias nga kun gusto sa mga kontraktor nga hibayran dayon sila, mao usab kini iyang gusto, matud pa ni Cabarrubias.

 Kini aron nga malikayan ang kahasol sa mga kontraktor ug kalikayan usab ang pagsurambaw sa prisyo.

Kini tungod kay daghan kaayong bilyakong kontraktor nga tungod sa kalangayan mobayad sa gobyerno, prisyohan usab nila og taga-liog ang ilang mga pakyawunon nga trabaho buwahan to dili sila maalakanse samtang magpaabot sa ilang kobrahunon gikan sa kagamhanan.

Miingon si Cabarrubias nga kun dalion ang pagbayad, paspasan usab sa kontraktor ang paghuman sa ilang trabaho busa dili na kaayo sila mamintaha sa pagpaburot sa prisyo sa ilang trabahuonong proyekto. Hinuon miingon si Cabarrubias nga kun may mga sipyat ang pagtrabaho sa usa ka proyekto, dili kalikayang dugay gyud hibayran ang kontraktor, usahay matabla pa gani ilabi na kun dili makoriher sa maong sipyat diha sa iyang gipakyaw nga trabaho.(Sanden J. Anadia) (BANAT NEWS)