Aksyon ni Cortes vs Lingam gidayeg ni Gov.

CEBU Philippines - Gisuportahan ni Gob. Gwendolyn Garcia ang pagpasira ni Mandaue City Mayor Jonas Cortes sa duha ka mga spas nga nagtanyag og lingam massage tungod sa kakulang sa pagkuha og sanitary permit.

Matud pa ni Garcia nga nakadayeg siya ni Cortes sa iyang pag-isyu og temporary closure order sa 789 Thai Lingam Spa nga nahimutang sa A.C. Cortes Avenue sa barangay Cambaro nga gipanag-iya sa usa ka Ernesto Cabalan ug ingon man ang Authentic Lingam Massage nga gipanag-iya ni Bella Talingting nga nahimutang sa Business Park, A.S. Fortuna St. sa barangay Bakilid.

Gawas nga wala kini sanitary permits gidudahan usab nga ang maong matang sa negosyo nag-promote og prostitusyon sanglit ang mga babayeng masahista gihimong “sexual pleasure” sa mga kustomer nga mga lalaki. Ang gobernadora nagkanayon nga iya usab nga gidayeg si Provincial Board member Agnes Magpale ang chiarman sa Committee on Children and Women Protection.

Kini tungod kay nihimo dayon kini og konkretong aksyon aron masumpo ang maong matang sa negosyo nga nagpahimulos sa kababayen-an ug wala maghatag og dignidad ug respeto sa katungod sa mga babaye.

Ang gobernadora nagtumbok nga magpaabot unya siya sa rekomendasyon ni Magpale batok sa nagpasiugda sa maong negosyo tungod kay kalapasan kini sa atong Batakang Balaod ug sa Provincial Women's Code.

Matud pa sa gobernadora nga magsilbing pahimangno ngadto sa ubang mga negosyante nga nag-operate og mga establisamentong susama niini samtang wala pa sila masakpi sa mga awtoridad. (Chester Abadilla) (BANAT NEWS)